jo dil-lagi hai use dil se mat laga liya kar

jo dil-lagī hai use dil se mat lagā liyā kar

hañsī kī baat koī ho to hañs hañsā liyā kar

vo rāsta nahīñ mahfūz us taraf jab bhī

safar kare to koī qāfila banā liyā kar

ġhalat hai jo bhī kamā.e idhar udhar kar de

bure dinoñ ke liye kuchh na kuchh bachā liyā kar

kahā na kar ki mujhe zahr se nahīñ raġhbat

tujhe vo pyaar se jo kuchh khilā.e khā liye kar

agar hai shauq tirā rang sāñvlā ho jaa.e

to merī jaan zarā dhuup meñ nahā liyā kar

ye baat sach hai ki masrūf huuñ bahut phir bhī

satā.e jab tujhe tanhā.ī to bulā liyā kar

samajhnā Thiik nahīñ bevafā.ī ġhaflat ko

jab aa.e dil meñ koī shak to aazmā liyā kar

use ye zāhirī bāteñ pasand haiñ 'āsim'

vo aa.e jab tujhe milne to ghar sajā liyā kar

jo dil-lagi hai use dil se mat laga liya kar

hansi ki baat koi ho to hans hansa liya kar

wo rasta nahin mahfuz us taraf jab bhi

safar kare to koi qafila bana liya kar

ghalat hai jo bhi kamae idhar udhar kar de

bure dinon ke liye kuchh na kuchh bacha liya kar

kaha na kar ki mujhe zahr se nahin raghbat

tujhe wo pyar se jo kuchh khilae kha liye kar

agar hai shauq tera rang sanwla ho jae

to meri jaan zara dhup mein naha liya kar

ye baat sach hai ki masruf hun bahut phir bhi

satae jab tujhe tanhai to bula liya kar

samajhna Thik nahin bewafai ghaflat ko

jab aae dil mein koi shak to aazma liya kar

use ye zahiri baaten pasand hain 'asim'

wo aae jab tujhe milne to ghar saja liya kar