jo dil mein hai wo kah Dalo lihaz-e-in-o-an kab tak

jo dil meñ hai vo kah Daalo lihāz-e-īñ-o-āñ kab tak

rahe iz.hār-e-haq meñ maslahat mohr-e-dahāñ kab tak

junūn-e-sāḳhta par lā-shu'ūrī kā gumāñ kab tak

raTe jāoge ye 'ishq-o-vafā kī dāstāñ kab tak

zamāne ne to karvaT lī hai aur rang-e-jahāñ badlā

magar dekheñ badalte haiñ hamāre mehrbāñ kab tak

zarā jāñcho tum apne dil ko parkho apne vā'doñ ko

tum apnā imtihāñ lo dūsroñ kā imtihāñ kab tak

idhar aao mai-e-hubb-e-vatan kī chāshnī chakkho

sadā 'kaifī' kī hai ye ḳhvāhish-e-jām-e-fuġhāñ kab tak

jo dil mein hai wo kah Dalo lihaz-e-in-o-an kab tak

rahe izhaar-e-haq mein maslahat mohr-e-dahan kab tak

junun-e-saKHta par la-shu'uri ka guman kab tak

raTe jaoge ye 'ishq-o-wafa ki dastan kab tak

zamane ne to karwaT li hai aur rang-e-jahan badla

magar dekhen badalte hain hamare mehrban kab tak

zara jaancho tum apne dil ko parkho apne wa'don ko

tum apna imtihan lo dusron ka imtihan kab tak

idhar aao mai-e-hubb-e-watan ki chashni chakkho

sada 'kaifi' ki hai ye KHwahish-e-jam-e-fughan kab tak