jo dil mein khaTakti hai kabhi kah bhi sakoge

jo dil meñ khaTaktī hai kabhī kah bhī sakoge

yā umr bhar aise hī pareshān phiroge

patthar kī hai dīvār to sar phoḌnā sīkho

ye haal rahegā to jiyoge na maroge

tūfān uThāoge kabhī apne jahāñ meñ

yā aañkh ke paanī hī ko sailāb kahoge

so.e ho añdhere meñ charāġhoñ ko bujhā kar

aa.egā nazar ḳhaak agar jaag uThoge

apnī hī haqīqat ko na pahchānñe vaalo

tum parda-e-aflāk ko kyā chaak karoge

ai barq kī mānind guzarte hue lamho

kyā aañkh jhapakne kī bhī mohlat nahīñ doge

raushan bhī karoge kabhī tārīki-e-shab ko

yā sham.a kī mānind pighalte hī rahoge

arzāñ hai bahut ḳhuun farozāñ hai bahut shaam

kyā apnī hī mahfil meñ charāġhāñ na karoge

maanā ki kaThin raah hai dushvār safar hai

kyā ek qadam bhī na mire saath chaloge

guzre hue lamhe kī vo be-nām kasak huuñ

tum jis kī tamannā meñ pareshān phiroge

chāhoge nishāñ bhī na rahe merā jahāñ meñ

gar zikr karoge to mirā naam na loge

ye gard-e-safar haal vo kar degī ki 'shahzād'

tum apnī bhī sūrat ko na pahchān sakoge

jo dil mein khaTakti hai kabhi kah bhi sakoge

ya umr bhar aise hi pareshan phiroge

patthar ki hai diwar to sar phoDna sikho

ye haal rahega to jiyoge na maroge

tufan uThaoge kabhi apne jahan mein

ya aankh ke pani hi ko sailab kahoge

soe ho andhere mein charaghon ko bujha kar

aaega nazar KHak agar jag uThoge

apni hi haqiqat ko na pahchanne walo

tum parda-e-aflak ko kya chaak karoge

ai barq ki manind guzarte hue lamho

kya aankh jhapakne ki bhi mohlat nahin doge

raushan bhi karoge kabhi tariki-e-shab ko

ya shama ki manind pighalte hi rahoge

arzan hai bahut KHun farozan hai bahut sham

kya apni hi mahfil mein charaghan na karoge

mana ki kaThin rah hai dushwar safar hai

kya ek qadam bhi na mere sath chaloge

guzre hue lamhe ki wo be-nam kasak hun

tum jis ki tamanna mein pareshan phiroge

chahoge nishan bhi na rahe mera jahan mein

gar zikr karoge to mera nam na loge

ye gard-e-safar haal wo kar degi ki 'shahzad'

tum apni bhi surat ko na pahchan sakoge