jo dil par bojh hai yarab zara bhi kam nahin hota

jo dil par bojh hai yārab zarā bhī kam nahīñ hotā

zamāna ġham to detā hai sharīk-e-ġham nahīñ hotā

ḳhazāna ilm kā hai lā-zavāl aisā zamāne meñ

jise bāñTo to baḌhtā hai pa hargiz kam nahīñ hotā

hamārā sar banā hai dosto ik ḳhaas miTTī se

kisī zālim kī chaukhaT par kabhī ye ḳham nahīñ hotā

zahe-qismat ḳhudā ne zabt kī tāqat mujhe dī hai

haqīqat meñ mirā ashkoñ se dāman nam nahīñ hotā

hazāroñ āfateñ ham ne sahīñ mahbūb kī ḳhātir

magar īsār kā jazba zarā bhī kam nahīñ hotā

pahuñch saktā nahīñ vo apnī manzil pe kisī sūrat

vo bad-qismat musāfir jis meñ kuchh dam-ḳham nahīñ hotā

zarā sī baat par āmāda ho jaa.e jo laḌne par

pujārī vo ahinsā kā chaman gautam nahīñ hotā

jo dil par bojh hai yarab zara bhi kam nahin hota

zamana gham to deta hai sharik-e-gham nahin hota

KHazana ilm ka hai la-zawal aisa zamane mein

jise banTo to baDhta hai pa hargiz kam nahin hota

hamara sar bana hai dosto ek KHas miTTi se

kisi zalim ki chaukhaT par kabhi ye KHam nahin hota

zahe-qismat KHuda ne zabt ki taqat mujhe di hai

haqiqat mein mera ashkon se daman nam nahin hota

hazaron aafaten hum ne sahin mahbub ki KHatir

magar isar ka jazba zara bhi kam nahin hota

pahunch sakta nahin wo apni manzil pe kisi surat

wo bad-qismat musafir jis mein kuchh dam-KHam nahin hota

zara si baat par aamada ho jae jo laDne par

pujari wo ahinsa ka chaman gautam nahin hota