jo dost tha wahi dushman hai kya kiya jae

jo dost thā vahī dushman hai kyā kiyā jaa.e

ajab ḳhalish ajab uljhan hai kyā kiyā jaa.e

basā huā hai jo ḳhushbū kī tarah sāñsoñ meñ

usī se ab mirī an-ban hai kyā kiyā jaa.e

yagāngat kā vo jazba idhar rahā na udhar

duā-salām bhī rasman hai kyā kiyā jaa.e

bahār meñ bhī mayassar gul-e-murād nahīñ

ye nā-murādī-e-dāman hai kyā kiyā jaa.e

fazā-e-sahn-e-chaman sho.ala-bār hai lekin

yahīñ hamārā nasheman hai kyā kiyā jaa.e

mujhe miTā ke rahegī ye raat hijr kī raat

azal se ye mirī dushman hai kyā kiyā jaa.e

chhupā.ūñ kaise 'vaqār' apne dil ke dāġhoñ ko

jo daaġh hai vahī raushan hai kyā kiyā jaa.e

jo dost tha wahi dushman hai kya kiya jae

ajab KHalish ajab uljhan hai kya kiya jae

basa hua hai jo KHushbu ki tarah sanson mein

usi se ab meri an-ban hai kya kiya jae

yagangat ka wo jazba idhar raha na udhar

dua-salam bhi rasman hai kya kiya jae

bahaar mein bhi mayassar gul-e-murad nahin

ye na-muradi-e-daman hai kya kiya jae

faza-e-sahn-e-chaman shoala-bar hai lekin

yahin hamara nasheman hai kya kiya jae

mujhe miTa ke rahegi ye raat hijr ki raat

azal se ye meri dushman hai kya kiya jae

chhupaun kaise 'waqar' apne dil ke daghon ko

jo dagh hai wahi raushan hai kya kiya jae