jo Dubte hue bazu nikal leta hai

jo Dūbte hue baazū nikāl letā hai

samundaroñ meñ bhī Taapu nikāl letā hai

idhar maiñ us kī hathelī pe phuul rakhtā huuñ

udhar vo jeb se bichchhū nikāl letā hai

isī liye maiñ gale se nahīñ lagātā use

vo pairahan se bhī ḳhushbū nikāl letā hai

kuchh aisī pyaas kā maarā huā hai be-sabrā

ke jaam dekh ke chullū nikāl letā hai

usī ke haath ḳhazāne asar ke lagte haiñ

duā ke saath jo aañsū nikāl letā hai

kisī ko raqs sikhātā hai vaqt kā pahiyā

kisī ke paañv se ghuñgrū nikāl letā hai

isī liye maiñ sunātā nahīñ ġhazal us ko

vo sher sun ke tarāzū nikāl letā hai

kisī ke kaam hī aa.egā jang meñ 'harshit'

badan se tiir agar tū nikāl letā hai

jo Dubte hue bazu nikal leta hai

samundaron mein bhi Tapu nikal leta hai

idhar main us ki hatheli pe phul rakhta hun

udhar wo jeb se bichchhu nikal leta hai

isi liye main gale se nahin lagata use

wo pairahan se bhi KHushbu nikal leta hai

kuchh aisi pyas ka mara hua hai be-sabra

ke jam dekh ke chullu nikal leta hai

usi ke hath KHazane asar ke lagte hain

dua ke sath jo aansu nikal leta hai

kisi ko raqs sikhata hai waqt ka pahiya

kisi ke panw se ghungru nikal leta hai

isi liye main sunata nahin ghazal us ko

wo sher sun ke taraazu nikal leta hai

kisi ke kaam hi aaega jang mein 'harshit'

badan se tir agar tu nikal leta hai