jo dur se hamein aksar KHuda sa lagta hai

jo duur se hameñ aksar ḳhudā sā lagtā hai

vahī qarīb se kuchh āshnā sā lagtā hai

kabhī hamārī nigāhoñ se dekh le us ko

phir us ke baa'd batā tujh ko kaisā lagtā hai

tamām raat jale din ko sard-mehr bane

badan kā shahr bhī shahr-e-anā sā lagtā hai

vo us kī sahmī sī chāhat jafā kī chilman meñ

vo bevafā bhī hameñ bā-vafā sā lagtā hai

bikharte TūTte in ziist ke makānoñ meñ

vo ik makān hameñ ḳhushnumā sā lagtā hai

salīb-o-dār pe chaḌh kar hue haiñ lā-fānī

ye dast-e-marg bhī dast-e-du'ā sā lagtā hai

jo dur se hamein aksar KHuda sa lagta hai

wahi qarib se kuchh aashna sa lagta hai

kabhi hamari nigahon se dekh le us ko

phir us ke ba'd bata tujh ko kaisa lagta hai

tamam raat jale din ko sard-mehr bane

badan ka shahr bhi shahr-e-ana sa lagta hai

wo us ki sahmi si chahat jafa ki chilman mein

wo bewafa bhi hamein ba-wafa sa lagta hai

bikharte TuTte in zist ke makanon mein

wo ek makan hamein KHushnuma sa lagta hai

salib-o-dar pe chaDh kar hue hain la-fani

ye dast-e-marg bhi dast-e-du'a sa lagta hai