jo dusron ki KHataen muaf karte hain

jo dūsroñ kī ḳhatā.eñ muaaf karte haiñ

dar-asl dil se kudūrat vo saaf karte haiñ

har ek baat meñ haamī nahīñ bharī jaatī

unheñ gila hai ki ham iḳhtilāf karte haiñ

kabhī gumān kī sūrat kabhī yaqīn ke saath

diloñ ke raaz kā ham inkishāf karte haiñ

hameñ yaqīñ bhī dilāte haiñ saath dene kā

vo sāzisheñ bhī hamāre ḳhilāf karte haiñ

kahīñ bhī pyaar se rahnā unheñ qubūl nahīñ

jahāñ bhī jaate haiñ dil meñ shigāf karte haiñ

unhīñ se azmat-e-urdu bahāl hai 'rāġhib'

jo guftugū meñ adā shiin qaaf karte haiñ

jo dusron ki KHataen muaf karte hain

dar-asl dil se kudurat wo saf karte hain

har ek baat mein hami nahin bhari jati

unhen gila hai ki hum iKHtilaf karte hain

kabhi guman ki surat kabhi yaqin ke sath

dilon ke raaz ka hum inkishaf karte hain

hamein yaqin bhi dilate hain sath dene ka

wo sazishen bhi hamare KHilaf karte hain

kahin bhi pyar se rahna unhen qubul nahin

jahan bhi jate hain dil mein shigaf karte hain

unhin se azmat-e-urdu bahaal hai 'raghib'

jo guftugu mein ada shin qaf karte hain