jo fan se fikr ki tadbir guftugu karegi

jo fan se fikr kī tadbīr guftugū karegī

to gūñgī bahrī bhī tasvīr guftugū karegī

maiñ jīte-jī use aisā hunar sikhā dūñgā

ki mere baa'd ye tahrīr guftugū karegī

'adālatoñ meñ gavāhī hameñ mile na mile

hamāre paañv kī zanjīr guftugū karegī

isī umiid pe āñkhoñ ke ḳhvāb zinda haiñ

ki ek din kavī tā'bīr guftugū karegī

pighal hī jā.egā vo sang-dil kisī din jab

mire zabān kī tāsīr guftugū karegī

badan se kar ke badan kī samā'atoñ ko duur

ye saañs ruuh se āḳhīr guftugū karegī

jo fan se fikr ki tadbir guftugu karegi

to gungi bahri bhi taswir guftugu karegi

main jite-ji use aisa hunar sikha dunga

ki mere ba'd ye tahrir guftugu karegi

'adalaton mein gawahi hamein mile na mile

hamare panw ki zanjir guftugu karegi

isi umid pe aankhon ke KHwab zinda hain

ki ek din kawi ta'bir guftugu karegi

pighal hi jaega wo sang-dil kisi din jab

mere zaban ki tasir guftugu karegi

badan se kar ke badan ki sama'aton ko dur

ye sans ruh se aaKHir guftugu karegi