jo farz aaed hua hai hum par use KHushi se ada karenge

jo farz aa.ed huā hai ham par use ḳhushī se adā kareñge

hamārā sheva yahī rahā hai jafā ke badle vafā kareñge

shikasta kashtī muhīb tūfān aur sāhil nazar se ojhal

azaab kitne hī aa.eñ ham pe na minnat-e-nāḳhudā kareñge

rasā.ī kaise vafā kī manzil pe hogī ye raaz ham se pūchho

jahāñ safar ḳhatm sab kā hogā vahīñ se ham ibtidā kareñge

ḳhushī ke jhūle haiñ jhūlne vaale kyā samajh paa.eñ zindagī ko

ye raaz un par khulegā jis dam vo dil ko ġham-āshnā kareñge

shajar hai be-barg kaliyāñ rauñdī huī gul-o-lāla haiñ fasurda

yahī hai manzar bahār kā to chaman meñ ham jā ke kyā kareñge

rahe haiñ zāt-e-ḳhudā se munkir gunāh taslīm hai magar ab

hayāt kī sarzanish se Dar kar buland dast-e-duā kareñge

azal se dastūr hai ye qaa.em na is meñ tarmīm ho sakegī

charāġh-hā-e-hayāt 'gauhar' jalā kareñge bujhā kareñge

jo farz aaed hua hai hum par use KHushi se ada karenge

hamara shewa yahi raha hai jafa ke badle wafa karenge

shikasta kashti muhib tufan aur sahil nazar se ojhal

azab kitne hi aaen hum pe na minnat-e-naKHuda karenge

rasai kaise wafa ki manzil pe hogi ye raaz hum se puchho

jahan safar KHatm sab ka hoga wahin se hum ibtida karenge

KHushi ke jhule hain jhulne wale kya samajh paen zindagi ko

ye raaz un par khulega jis dam wo dil ko gham-ashna karenge

shajar hai be-barg kaliyan raundi hui gul-o-lala hain fasurda

yahi hai manzar bahaar ka to chaman mein hum ja ke kya karenge

rahe hain zat-e-KHuda se munkir gunah taslim hai magar ab

hayat ki sarzanish se Dar kar buland dast-e-dua karenge

azal se dastur hai ye qaem na is mein tarmim ho sakegi

charagh-ha-e-hayat 'gauhar' jala karenge bujha karenge