جو گئی ہم سے روٹھ کر آواز

جو گئی ہم سے روٹھ کر آواز

ہائے کتنی تھی معتبر آواز

شور دنیا کا سنتے پھرتے ہیں

دل کی سنتا نہیں مگر آواز

اس کی آواز میں تھا اک جادو

کوئی لائے وہ ڈھونڈ کر آواز

ایک سایہ ادھر سے گزرا ہے

وہ گئی ہے ابھی ادھر آواز

ہم نے سن کر کے یہ ہی دیکھا ہے

اب بھی کرتی ہے وہ اثر آواز

خون کے اشک وہ رلاتی ہے

اس کی سنیے تو ڈوب کر آواز

ایک خاموشی دے گئی ہم کو

وہ جو سنتے تھے کھانس کر آواز

اس کا ماتم منائیں ہم چاہے

اب نہ آئے گی لوٹ کر آواز

اور سب لوگ شور کرتے رہے

صرف ہم نے دی مختصر آواز