jo gali bhi thi mere shahr ki baDi aafaton mein ghiri rahi

jo galī bhī thī mire shahr kī baḌī āfatoñ meñ ghirī rahī

kabhī kaal chehroñ kā paḌ gayā kabhī khiḌkiyoñ kī kamī rahī

jo guzarne vaale zamāne the baḌī ḳhāmushī se guzar ga.e

jo ghaḌī bañdhī thī kalā.ī se vo kalā.ī hī se bañdhī rahī

jo kivāḌ band paḌe hue the vo saare khulte chale ga.e

magar ik sadā mirī dastakoñ kī jo tere dar pe paḌī rahī

vo jo paTriyāñ thiiñ chamak chamak ke kisī kī aañkh meñ bujh ga.iiñ

vo jo rail thī kahīñ raste meñ baḌī bebasī se khaḌī rahī

vo jo dastaras meñ thā mo.ajiza use koī rasta nahīñ milā

mire haath meñ thī jo raushnī mire haath hī meñ rakhī rahī

baḌā gahrā rishta hai abr kā mire dil kī hālat-e-zār se

mirī chhat pe bārisheñ bhī huiiñ mirī aañkh meñ bhī namī rahī

jo gali bhi thi mere shahr ki baDi aafaton mein ghiri rahi

kabhi kal chehron ka paD gaya kabhi khiDkiyon ki kami rahi

jo guzarne wale zamane the baDi KHamushi se guzar gae

jo ghaDi bandhi thi kalai se wo kalai hi se bandhi rahi

jo kiwaD band paDe hue the wo sare khulte chale gae

magar ek sada meri dastakon ki jo tere dar pe paDi rahi

wo jo paTriyan thin chamak chamak ke kisi ki aankh mein bujh gain

wo jo rail thi kahin raste mein baDi bebasi se khaDi rahi

wo jo dastaras mein tha moajiza use koi rasta nahin mila

mere hath mein thi jo raushni mere hath hi mein rakhi rahi

baDa gahra rishta hai abr ka mere dil ki haalat-e-zar se

meri chhat pe barishen bhi huin meri aankh mein bhi nami rahi