جو گلیوں میں غبارے بیچتے ہیں

جو گلیوں میں غبارے بیچتے ہیں

بھرم اپنے وہ سارے بیچتے ہیں

ٹکٹ دے کر سیاحت کی جگہ پر

وہ قدرت کے نظارے بیچتے ہیں

نشے کی شکل میں کچھ لوگ ظالم

یہاں وقتی سہارے بیچتے ہیں

ہمیشہ فائدے کا نام دے کر

یہ تاجر کیوں خسارے بیچتے ہیں

ہیں کچھ ایسے بھی جو غربت سے ڈر کر

یہاں آنکھوں کے تارے بیچتے ہیں

بڑے سب خواب اک روٹی کے بدلے

لو ہم سارے کے سارے بیچتے ہیں

اجی یہ صرف سوچوں کی دکاں ہے

یہاں ساماں ادھارے بیچتے ہیں

ہے جن کا حسن شعلہ بار یاں پر

وہ لوگوں میں شرارے بیچتے ہیں

سنا ہے ہم نے ردی کی دکاں پر

وہ اپنے شاہ پارے بیچتے ہیں

وہ جن کی گفتگو ہے شہد جیسی

وہ سانپوں کے پٹارے بیچتے ہیں

سنا ہے آج کل بیٹھے ہیں فارغ

جو لوگوں میں شمارے بیچتے ہیں

کہاں پہلے کبھی ہوتا تھا ایسا

کہ اب تو استخارے بیچتے ہیں