jo gham mein jalte rahe umr-bhar diya ban kar

jo ġham meñ jalte rahe umr-bhar diyā ban kar

bujhā ga.ī hai unheñ maut ab havā ban kar

vo ḳhāmushī jo tirī bazm ne hameñ baḳhshī

ḳhalā-e-zehn meñ gūñjī hai ik sadā ban kar

jo tū ne mujh ko ġham-e-lā-zavāl baḳhshā thā

vo zindagī meñ rahā merā rahnumā ban kar

vo jin ke lams se tū khil ke phuul bantā thā

vo ab bhaTakte haiñ dar par tire sabā ban kar

jab un kī bazm se lauTe to ḳhud ko pahchānā

vahāñ se aa.e ham 'āzād' kyā se kyā ban kar

jo gham mein jalte rahe umr-bhar diya ban kar

bujha gai hai unhen maut ab hawa ban kar

wo KHamushi jo teri bazm ne hamein baKHshi

KHala-e-zehn mein gunji hai ek sada ban kar

jo tu ne mujh ko gham-e-la-zawal baKHsha tha

wo zindagi mein raha mera rahnuma ban kar

wo jin ke lams se tu khil ke phul banta tha

wo ab bhaTakte hain dar par tere saba ban kar

jab un ki bazm se lauTe to KHud ko pahchana

wahan se aae hum 'azad' kya se kya ban kar