جو غم ملے تھے ہم سے سنبھالے نہیں گئے

جو غم ملے تھے ہم سے سنبھالے نہیں گئے

یہ کم نہیں ہے در سے جو ٹالے نہیں گئے

اک بار اس کو سوچ لیا تھا خیال نے

پھر اس کے بعد دور اجالے نہیں گئے

کچھ ایسے راستے بھی جنوں کی ہیں یادگار

جو راستے کسی سے نکالے نہیں گئے

جمتا نہ میرے نام پہ تشکیک کا غبار

تاریخ کے ورق ہی کھنگالے نہیں گئے

ان منظروں کے واسطے ہم کو چنا گیا

نیزوں پہ سر تمہارے اچھالے نہیں گئے

اک راز جو بتا دیا اس کی نگاہ نے

پھر دور اس سے قافلے والے نہیں گئے

آنکھوں میں اس کی نورؔ چمک تھی یقین کی

بے کار میرے پاؤں کے چھالے نہیں گئے