jo gham mile the humse sanbhaale nahin gae

jo ġham mile the ham se sañbhāle nahīñ ga.e

ye kam nahīñ hai dar se jo Taale nahīñ ga.e

ik baar us ko soch liyā thā ḳhayāl ne

phir is ke baad duur ujāle nahīñ ga.e

kuchh aise rāste bhī junūñ kī haiñ yādgār

jo rāste kisī se nikāle nahīñ ga.e

jamtā na mere naam pe tashkīk kā ġhubār

tārīḳh ke varaq hī khañgāle nahīñ ga.e

in manzaroñ ke vāste ham ko chunā gayā

nezoñ pe sar tumhāre uchhāle nahīñ ga.e

ik raaz jo batā diyā us kī nigāh ne

phir duur us se qāfile vaale nahīñ ga.e

āñkhoñ meñ us kī 'nūr' chamak thī yaqīn kī

bekār mere paaoñ ke chhāle nahīñ ga.e

jo gham mile the hum se sanbhaale nahin gae

ye kam nahin hai dar se jo Tale nahin gae

ek bar us ko soch liya tha KHayal ne

phir is ke baad dur ujale nahin gae

kuchh aise raste bhi junun ki hain yaadgar

jo raste kisi se nikale nahin gae

jamta na mere nam pe tashkik ka ghubar

tariKH ke waraq hi khangale nahin gae

in manzaron ke waste hum ko chuna gaya

nezon pe sar tumhaare uchhaale nahin gae

ek raaz jo bata diya us ki nigah ne

phir dur us se qafile wale nahin gae

aankhon mein us ki 'nur' chamak thi yaqin ki

bekar mere paon ke chhaale nahin gae