jo gaya yahan se isi makan mein aaega

jo gayā yahāñ se isī makān meñ aa.egā

thā sitāra TuuT ke āsamān meñ aa.egā

kabhī ḳhvāb sā kabhī ḳhushbuoñ kā hijāb sā

baḌī mushkiloñ se vo mere dhyān meñ aa.egā

use sochnā na samundaroñ ke dimāġh se

vo guhar sadaf ke faqat gumān meñ aa.egā

nahīñ aa sakā jo maiñ gul-zamīnoñ ke jashn tak

tū ġhubār sā kisī sabz lawn meñ aa.egā

abhī tar haiñ lab tirī guftugū kī miThās se

tirā zā.iqa bhī mirī zabān meñ aa.egā

abhī peḌ ko kisī saḳht rut kā hai sāmnā

agar uTh sakā to baḌī uThān meñ aa.egā

jo gaya yahan se isi makan mein aaega

tha sitara TuT ke aasaman mein aaega

kabhi KHwab sa kabhi KHushbuon ka hijab sa

baDi mushkilon se wo mere dhyan mein aaega

use sochna na samundaron ke dimagh se

wo guhar sadaf ke faqat guman mein aaega

nahin aa saka jo main gul-zaminon ke jashn tak

tu ghubar sa kisi sabz lawn mein aaega

abhi tar hain lab teri guftugu ki miThas se

tera zaiqa bhi meri zaban mein aaega

abhi peD ko kisi saKHt rut ka hai samna

agar uTh saka to baDi uThan mein aaega