جو گفتگو سے قوم کا رہبر لگا مجھے

جو گفتگو سے قوم کا رہبر لگا مجھے

جب ہم سفر بنا تو بہت ڈر لگا مجھے

جب اشک ان کی آنکھ کے پلکوں تک آ گئے

گھر کا ہر ایک گوشہ منور لگا مجھے

لے کر اداسیاں جو تری بزم سے اٹھا

بے حد اجاڑ شہر کا منظر لگا مجھے

اپنے وجود کا لیا جب جب بھی جائزہ

ہر شخص اپنی ذات سے بہتر لگا مجھے

ترک وفا کا جس نے بھی مجھ کو دیا سبق

ہر ایسا دوست راہ کا پتھر لگا مجھے

تھا اس کی بات چیت میں کیسا یہ بانکپن

آئینہ صاف تھا مگر آذر لگا مجھے

رضوانؔ اس کے خواب بہت ہی حسین تھے

ہجر وفا کا جو بھی شناور لگا مجھے