جو گل کھلا وہ داغ دل بوستاں ہوا

جو گل کھلا وہ داغ دل بوستاں ہوا

عبرت نگاہ دل نہ کبھی شادماں ہوا

جو دل میں رہ سکا نہ زباں سے بیاں ہوا

بن کر جنوں وہ راز محبت عیاں ہوا

کہنے سے غیر کے ہوئے وہ تیغ آزما

مجھ کو نہ آزمائیں کہ بس امتحاں ہوا

اس خود فریب دل کو امیدیں ہیں اور وہ

نا مہرباں ہوا نہ کبھی مہرباں ہوا

اکثر رہا میں تیری جفاؤں سے کامراں

اچھا ہوا وفا کا میری امتحاں ہوا

پرسان حال تیری جفا بھی رہی نہ جب

مجھ سے خلاف وضع نہ ضبط فغاں ہوا

ممنون بیخودی ہوں میں بیخودؔ کہ عمر بھر

مجھ پر گراں نہ بار غم دو جہاں ہوا