jo guzre dil pe chehre par use tahrir karna kya

jo guzre dil pe chehre par use tahrīr karnā kyā

ki ġham kā bhī hai ik mausam use zanjīr karnā kyā

hamāre vāste kaafī thā ik ġhunche kā khil jaanā

hameñ phūloñ bhare bāġhoñ kī ab jāgīr karnā kyā

bahut kuchh kah diyā hai chashm-o-abrū ke ishāroñ ne

ab apne an-kahe jazbāt kī tahqīr karnā kyā

samay kī bārishoñ se dhul ga.iiñ barsoñ kī tahrīreñ

na.e qisse kitāb-e-dil meñ ab tahrīr karnā kyā

nigāhoñ hī meñ jab Thahrā liyā aks-e-nazar terā

gale ke haar meñ kanda tirī tasvīr karnā kyā

to kyā ibrat nahīñ ābādiyoñ ke ye ḳharābe bhī

falak par bastiyāñ jā kar na.ī ta.amīr karnā kyā

tamannāoñ ke jugnū uḌ ga.e haiñ band muTThī se

hathelī kī lakīroñ meñ chhupī taqdīr karnā kyā

jo guzre dil pe chehre par use tahrir karna kya

ki gham ka bhi hai ek mausam use zanjir karna kya

hamare waste kafi tha ek ghunche ka khil jaana

hamein phulon bhare baghon ki ab jagir karna kya

bahut kuchh kah diya hai chashm-o-abru ke ishaaron ne

ab apne an-kahe jazbaat ki tahqir karna kya

samay ki barishon se dhul gain barson ki tahriren

nae qisse kitab-e-dil mein ab tahrir karna kya

nigahon hi mein jab Thahra liya aks-e-nazar tera

gale ke haar mein kanda teri taswir karna kya

to kya ibrat nahin aabaadiyon ke ye KHarabe bhi

falak par bastiyan ja kar nai tamir karna kya

tamannaon ke jugnu uD gae hain band muTThi se

hatheli ki lakiron mein chhupi taqdir karna kya