jo hai hi nahin wo abhi chahiye

jo hai hī nahīñ vo abhī chāhiye

duā yuuñ na ai multajī chāhiye

yahī chāhiye bas yahī chāhiye

hameñ zindagī sarvarī chāhiye

duā māñgne kā salīqa nahīñ

in āñkhoñ meñ kuchh to namī chāhiye

uge fasl kaise zamīñ bāñjh hai

numū ke liye kuchh namī chāhiye

nahīñ hai pata kal phir aa.e na aa.e

hameñ va.ada-e-sarmadī chāhiye

jo ghaḌnā ho kuuza bhī koī tumheñ

to miTTī bhī chiknī chhanī chāhiye

baḌhā jā rahā hai jo ḳhvāhish kā jaal

to phailī huī zindagī chāhiye

na ho itnī garmī ki jal jaa.e baat

laboñ par numāyāñ tarī chāhiye

zabāñ par na ho shikva-e-tishnagī

samundar sī dariyā-dilī chāhiye

agar dukh hai paiġhambaroñ kī tarah

to phir mujh ko paiġhambarī chāhiye

guzāre haiñ jaise ye do chaar din

hazāroñ baras zindagī chāhiye

talabgār huuñ tere jalve kā maiñ

nahīñ mujh ko lekin ġhashī chāhiye

daraḳhtoñ se chāhe qalam kaaT lo

na saa.e meñ us ke kamī chāhiye

bhaTaktā huuñ raste pe maiñ is liye

ki manzil nahīñ gumrahī chāhiye

uḌo tum jahāzoñ sā 'nusrat' magar

zamīñ par nazar bhī jamī chāhiye

jo hai hi nahin wo abhi chahiye

dua yun na ai multaji chahiye

yahi chahiye bas yahi chahiye

hamein zindagi sarwari chahiye

dua mangne ka saliqa nahin

in aankhon mein kuchh to nami chahiye

uge fasl kaise zamin banjh hai

numu ke liye kuchh nami chahiye

nahin hai pata kal phir aae na aae

hamein wada-e-sarmadi chahiye

jo ghaDna ho kuza bhi koi tumhein

to miTTi bhi chikni chhani chahiye

baDha ja raha hai jo KHwahish ka jal

to phaili hui zindagi chahiye

na ho itni garmi ki jal jae baat

labon par numayan tari chahiye

zaban par na ho shikwa-e-tishnagi

samundar si dariya-dili chahiye

agar dukh hai paighambaron ki tarah

to phir mujh ko paighambari chahiye

guzare hain jaise ye do chaar din

hazaron baras zindagi chahiye

talabgar hun tere jalwe ka main

nahin mujh ko lekin ghashi chahiye

daraKHton se chahe qalam kaT lo

na sae mein us ke kami chahiye

bhaTakta hun raste pe main is liye

ki manzil nahin gumrahi chahiye

uDo tum jahazon sa 'nusrat' magar

zamin par nazar bhi jami chahiye