jo hai nae waqt ka taqaza to ye rawish iKHtiyar kar lun

jo hai na.e vaqt kā taqāzā to ye ravish iḳhtiyār kar luuñ

ki ḳhaar āñkhoñ meñ chun ke rakh luuñ dahakte sho.aloñ ko pyaar kar luuñ

chaman kī fitrat samajh rahā huuñ ḳhizāñ ko bhī jāntā huuñ lekin

ishāre karte haiñ ġhuncha-o-gul ki bandagī-e-bahār kar luuñ

ye dekhnā hai rah-e-talab meñ mileñgī gumrāhiyāñ kahāñ tak

fareb-e-manzil jo de rahe haiñ maiñ vo bagūle shumār kar luuñ

junūñ ne ye mashvara diyā hai na ho kamī un kī justujū meñ

shu.ūr kī maslahat yahī hai shikast kā e'tibār kar luuñ

kahāñ se lā.ūñ maiñ vo nigāheñ jo kashmakash ḳhār-o-gul kī dekheñ

ḳhudā jo taufīq mujh ko de de nazāra-e-kār-zār kar luuñ

ubharte sūraj kī raushnī ke abhī ka.ī zāviye haiñ pinhāñ

kiran jo pahchāntī hai mujh ko maiñ us kā aur intizār kar luuñ

ravā-ravī meñ hai umr merī shikār huuñ ġhalba-e-safar kā

zarā Thahar jaa.e vaqt kī rau shikāyat-e-rozgār kar luuñ

musalsal ik inqalāb kyā kyā zamīr ko chhū rahā hai 'nāzish'

agar karam kā na aasrā ho to sar-kashī iḳhtiyār kar luuñ

jo hai nae waqt ka taqaza to ye rawish iKHtiyar kar lun

ki KHar aankhon mein chun ke rakh lun dahakte shoalon ko pyar kar lun

chaman ki fitrat samajh raha hun KHizan ko bhi jaanta hun lekin

ishaare karte hain ghuncha-o-gul ki bandagi-e-bahaar kar lun

ye dekhna hai rah-e-talab mein milengi gumrahiyan kahan tak

fareb-e-manzil jo de rahe hain main wo bagule shumar kar lun

junun ne ye mashwara diya hai na ho kami un ki justuju mein

shuur ki maslahat yahi hai shikast ka e'tibar kar lun

kahan se laun main wo nigahen jo kashmakash KHar-o-gul ki dekhen

KHuda jo taufiq mujh ko de de nazara-e-kar-zar kar lun

ubharte suraj ki raushni ke abhi kai zawiye hain pinhan

kiran jo pahchanti hai mujh ko main us ka aur intizar kar lun

rawa-rawi mein hai umr meri shikar hun ghalba-e-safar ka

zara Thahar jae waqt ki rau shikayat-e-rozgar kar lun

musalsal ek inqalab kya kya zamir ko chhu raha hai 'nazish'

agar karam ka na aasra ho to sar-kashi iKHtiyar kar lun