jo hum par hua hai karam dekhna

jo ham par huā hai karam dekhnā

vo Dhā.egā kyā kyā sitam dekhnā

mayassar kahāñ haiñ tan-āsāniyāñ

muqaddar meñ likkhā hai ġham dekhnā

sitam mere dil par karam ġhair par

zarā un kā tarz-e-amal dekhnā

ḳhudā jaane ye kyā maqām aa gayā

ki mushkil hai naqsh-e-qadam dekhnā

yahī mā-hasal hai ġham-e-ishq kā

ki apnī hī āñkhoñ ko nam dekhnā

use rang-e-duniyā se kyā vāsta

jo chāhe na jāh-o-hasham dekhnā

jo kahte haiñ 'ādil' ki sab kuchh haiñ ham

to un ko ḳhudā kī qasam dekhnā

jo hum par hua hai karam dekhna

wo Dhaega kya kya sitam dekhna

mayassar kahan hain tan-asaniyan

muqaddar mein likkha hai gham dekhna

sitam mere dil par karam ghair par

zara un ka tarz-e-amal dekhna

KHuda jaane ye kya maqam aa gaya

ki mushkil hai naqsh-e-qadam dekhna

yahi ma-hasal hai gham-e-ishq ka

ki apni hi aankhon ko nam dekhna

use rang-e-duniya se kya wasta

jo chahe na jah-o-hasham dekhna

jo kahte hain 'adil' ki sab kuchh hain hum

to un ko KHuda ki qasam dekhna