jo humse zindagi har dam KHafa malum hoti hai

jo ham se zindagī har dam ḳhafā ma.alūm hotī hai

hameñ to saaf apnī hī ḳhatā ma.alūm hotī hai

zarā sī bad-gumānī thī aur un kā ab ye aalam hai

duā dete haiñ un ko bad-duā ma.alūm hotī hai

lagā.eñge gale se kab vo kab nazreñ churāeñge

hameñ pahle se un kī har adā ma.alūm hotī hai

sañvar jaatā hai us se baat karke yuuñ mirā lahja

mujhe ḳhud dil-nashīñ apnī sadā ma.alūm hotī hai

ukhāḌe ḳheme itnī baar ham ḳhāna-ba-doshoñ ne

ki ab apnī sī har āb-o-havā ma.alūm hotī hai

jo hum se zindagi har dam KHafa malum hoti hai

hamein to saf apni hi KHata malum hoti hai

zara si bad-gumani thi aur un ka ab ye aalam hai

dua dete hain un ko bad-dua malum hoti hai

lagaenge gale se kab wo kab nazren churaenge

hamein pahle se un ki har ada malum hoti hai

sanwar jata hai us se baat karke yun mera lahja

mujhe KHud dil-nashin apni sada malum hoti hai

ukhaDe KHeme itni bar hum KHana-ba-doshon ne

ki ab apni si har aab-o-hawa malum hoti hai