jo hamara sharik-e-haal raha

jo hamārā sharīk-e-hāl rahā

us kā har dam hameñ ḳhayāl rahā

be-niyāzī thī har adā un kī

pyaar apnā magar bahāl rahā

ham na ghabrā.e hādsoñ se kabhī

takiya-e-rabb-e-zul-jalāl rahā

aah mehnat-kashoñ kī majbūrī

rozī roTī kā hī savāl rahā

ho ga.ī shāhkār har taḳhlīq

rū-ba-rū jab tirā jamāl rahā

rāh-e-manzil huī bahut āsāñ

ham-safar jab bhī ham-ḳhayāl rahā

jis ne chāhā na dil se apnoñ ko

zindagī bhar vo pur-malāl rahā

paa.ī me.arāj-e-zindagī us ne

fikr-o-fan meñ jo bā-kamāl rahā

ham ne man-māniyāñ na kiiñ 'nayyar'

āl-o-aulād kā ḳhayāl rahā

jo hamara sharik-e-haal raha

us ka har dam hamein KHayal raha

be-niyazi thi har ada un ki

pyar apna magar bahaal raha

hum na ghabrae hadson se kabhi

takiya-e-rabb-e-zul-jalal raha

aah mehnat-kashon ki majburi

rozi roTi ka hi sawal raha

ho gai shahkar har taKHliq

ru-ba-ru jab tera jamal raha

rah-e-manzil hui bahut aasan

ham-safar jab bhi ham-KHayal raha

jis ne chaha na dil se apnon ko

zindagi bhar wo pur-malal raha

pai mearaj-e-zindagi us ne

fikr-o-fan mein jo ba-kamal raha

hum ne man-maniyan na kin 'nayyar'

aal-o-aulad ka KHayal raha