جو ہمارا شریک حال رہا

جو ہمارا شریک حال رہا

اس کا ہر دم ہمیں خیال رہا

بے نیازی تھی ہر ادا ان کی

پیار اپنا مگر بحال رہا

ہم نہ گھبرائے حادثوں سے کبھی

تکیۂ رب ذوالجلال رہا

آہ محنت کشوں کی مجبوری

روزی روٹی کا ہی سوال رہا

ہو گئی شاہکار ہر تخلیق

روبرو جب ترا جمال رہا

راہ منزل ہوئی بہت آساں

ہم سفر جب بھی ہم خیال رہا

جس نے چاہا نہ دل سے اپنوں کو

زندگی بھر وہ پر ملال رہا

پائی معراج زندگی اس نے

فکر و فن میں جو با کمال رہا

ہم نے من مانیاں نہ کیں نیرؔ

آل و اولاد کا خیال رہا