جو حق نوائی کو سمجھے ہنر نہیں ملتا

جو حق نوائی کو سمجھے ہنر نہیں ملتا

یہاں پہ کوئی بھی اہل نظر نہیں ملتا

کہ جس پہ ناز کریں اور خوب اترائیں

سخن میں اپنے وہ حسن اثر نہیں ملتا

جنون دل ہے طلب گار سربلندی کا

بھلے ہی حوصلۂ بال و پر نہیں ملتا

کسی کے حصے میں آتی ہے سلطنت پوری

کسی کو پیار بھی کیوں چاہ کر نہیں ملتا

جہاں پہ ہوتی ہے مہر و خلوص کی بارش

دیار دل میں اجڑنے کا ڈر نہیں ملتا

میں تنگ آ گیا ہجرت کے کرب سے لوگو

سکون دل ملے جس میں وہ گھر نہیں ملتا

کسے میں سونپ دوں اپنی متاع دل اشرفؔ

تمہارے جیسا کوئی معتبر نہیں ملتا