jo ho saka na mera usko bhul jaun main

jo ho sakā na mirā us ko bhuul jā.ūñ maiñ

parā.ī aag meñ kyuuñ uñgliyāñ jalā.ūñ maiñ

vo ab ke jaa.e to phir lauT kar na aa.e kabhī

bhulā.e aise ki phir yaad bhī na aa.uuñ maiñ

sukhī rahe vo sadā apne ghar ke āñgan meñ

is ik duā ke liye haath ab uThā.ūñ maiñ

na.ī rutoñ ke jhamele hoñ us kā zād-e-safar

shikast-e-arz-e-tamannā pe gungunā.ūñ maiñ

uThā.e naaz vahī jis kī vo amānat hai

na rūThe mujh se na jā kar use manā.ūñ maiñ

vo rotī āñkhoñ kare chaak merī tasvīreñ

ik ek kar ke sabhī us ke ḳhat jalā.ūñ maiñ

uThā ke dekhe vo khiḌkī ke reshmī parde

to chāhne pe bhī us ko nazar na aa.uuñ maiñ

havā ke haath bhī paiġhām vo agar bheje

ḳhayāl ban ke bhī us ke nagar na jā.ūñ maiñ

vo hādsāt kī hiddat se jab pighalne lage

to chāñd ban ke ḳhunuk dil meñ jagmagā.ūñ maiñ

jo ho saka na mera us ko bhul jaun main

parai aag mein kyun ungliyan jalaun main

wo ab ke jae to phir lauT kar na aae kabhi

bhulae aise ki phir yaad bhi na aaun main

sukhi rahe wo sada apne ghar ke aangan mein

is ek dua ke liye hath ab uThaun main

nai ruton ke jhamele hon us ka zad-e-safar

shikast-e-arz-e-tamanna pe gungunaun main

uThae naz wahi jis ki wo amanat hai

na ruThe mujh se na ja kar use manaun main

wo roti aankhon kare chaak meri taswiren

ek ek kar ke sabhi us ke KHat jalaun main

uTha ke dekhe wo khiDki ke reshmi parde

to chahne pe bhi us ko nazar na aaun main

hawa ke hath bhi paigham wo agar bheje

KHayal ban ke bhi us ke nagar na jaun main

wo hadsat ki hiddat se jab pighalne lage

to chand ban ke KHunuk dil mein jagmagaun main