jo ho wara-e-zat wo jina hi aur hai

jo ho varā-e-zāt vo jiinā hī aur hai

jiine kā ahl-e-dil ke qarīna hī aur hai

tum sikka-e-ravāñ kī havas meñ ho tum ko kyā

juuyā haiñ jin ke ham vo ḳhazīna hī aur hai

ham sāhil-e-najāt pe kashtī jalā chuke

ab rahnumā koī na safīna hī aur hai

likh kar diyā thā us ne jo va.ada visāl kā

us meñ koī nayā sā mahīna hī aur hai

pheñkī na jaane us ne mirī qāsh-e-dil kahāñ

añgushtarī meñ ab to nagīna hī aur hai

pahuñchā sambhal sambhal ke sar-e-bām tab khulā

manzil nahīñ ye us kī ye ziina hī aur hai

vo din ga.e ki sote the ham bhī pasāre paañv

muddat se ab to shaġhl-e-shabīna hī aur hai

'haqqī' ye apnā chashma-e-rañgīñ utāriye

dekheñge phir ki dīda-e-bīnā hī aur hai

jo ho wara-e-zat wo jina hi aur hai

jine ka ahl-e-dil ke qarina hi aur hai

tum sikka-e-rawan ki hawas mein ho tum ko kya

juya hain jin ke hum wo KHazina hi aur hai

hum sahil-e-najat pe kashti jala chuke

ab rahnuma koi na safina hi aur hai

likh kar diya tha us ne jo wada visal ka

us mein koi naya sa mahina hi aur hai

phenki na jaane us ne meri qash-e-dil kahan

angushtari mein ab to nagina hi aur hai

pahuncha sambhal sambhal ke sar-e-baam tab khula

manzil nahin ye us ki ye zina hi aur hai

wo din gae ki sote the hum bhi pasare panw

muddat se ab to shaghl-e-shabina hi aur hai

'haqqi' ye apna chashma-e-rangin utariye

dekhenge phir ki dida-e-bina hi aur hai