jo hua wo zehn mein tha nahin jo tha zehn mein wo hua nahin

jo huā vo zehn meñ thā nahīñ jo thā zehn meñ vo huā nahīñ

jo gumān meñ na thā mil gayā jo thā haath meñ vo milā nahīñ

vo jo ham meñ tum meñ thā fāsla ye kamāl us ke sabab huā

vo sunā gayā jo kahā nahīñ jo kahā gayā vo sunā nahīñ

vahī kibr hai mirī ḳhaak meñ vahī jahl hai mirī zaat meñ

jo sharār hai vo bujhā nahīñ jo charāġh hai vo jalā nahīñ

vahī thī havā vahī thī fazā hameñ bas paroñ ko thā kholnā

tujhe ḳhauf thā tū uḌā nahīñ mujhe shauq thā maiñ rukā nahīñ

sam-e-zāt ho sam-e-kun-fakāñ sam-e-ġhair ho sam-e-dostāñ

koī zahr mujh se bachā nahīñ koī zahr tum ne piyā nahīñ

vo to ḳhatm kah ke guzar gayā maiñ ḳhayāl-e-hijr se mar gayā

vo gayā to pīchhe muḌā nahīñ maiñ kahīñ yahāñ se gayā nahīñ

jo hua wo zehn mein tha nahin jo tha zehn mein wo hua nahin

jo guman mein na tha mil gaya jo tha hath mein wo mila nahin

wo jo hum mein tum mein tha fasla ye kamal us ke sabab hua

wo suna gaya jo kaha nahin jo kaha gaya wo suna nahin

wahi kibr hai meri KHak mein wahi jahl hai meri zat mein

jo sharar hai wo bujha nahin jo charagh hai wo jala nahin

wahi thi hawa wahi thi faza hamein bas paron ko tha kholna

tujhe KHauf tha tu uDa nahin mujhe shauq tha main ruka nahin

sam-e-zat ho sam-e-kun-fakan sam-e-ghair ho sam-e-dostan

koi zahr mujh se bacha nahin koi zahr tum ne piya nahin

wo to KHatm kah ke guzar gaya main KHayal-e-hijr se mar gaya

wo gaya to pichhe muDa nahin main kahin yahan se gaya nahin