jo iltifat zara bhi nigah-e-yar kare

jo iltifāt zarā bhī nigāh-e-yār kare

mirī ḳhizāñ ko na sharminda-e-bahār kare

vo zindagī ki jo tār-e-nafas pe ho mauqūf

ḳhilāf-e-aql hai us kā jo e.atibār kare

chhupā rahā huuñ maiñ ai zabt-e-ġham mohabbat ko

magar ye Dar hai ki ifshā nigāh-e-yār kare

jo ban gayā hai sabab rāhatoñ kā duniyā meñ

vahī gunāh na mahshar meñ sharmsār kare

usī ko hāsil-e-sad-zindagī samajhtā huuñ

vo naqd-e-umr jise sarf-e-rāh-e-yār kare

sipās-sanj-e-ḳhizāñ hī tamām umr rahūñ

vo dil na de ki jo girvīda-e-bahār kare

vo jaan de na sukūñ kī talāsh ho jis ko

vo dil hameñ de jo har lahza be-qarār kare

zahe-nasīb mire vaah re karam us kā

jo apne bandoñ meñ mujh ko bhī vo shumār kare

banā.ūñ rashk-e-bahārāñ na kis liye us ko

vo zaḳhm jo mire siine ko gul-ezār kare

tarīq-e-kār hameñ ho atā vahī yā-rab

binā-e-rasm-e-mohabbat jo ustuvār kare

payām-e-vasl na kyoñ le ke maut aa jaa.e

tamām umr agar sarf-e-rāh-e-yār kare

dayār-e-sarvar-e-ḳhūbāñ se vo nasīm aa.e

mirī ḳhizāñ ko jo sarmāya-e-bahār kare

na sargirāñ ho vahī baada chāhtā huuñ maiñ

vo baada kyā ho jo sarf-e-rah-e-ḳhumār kare

jo inqalāb pasand kā.enāt ḳhud hī ho

to phir zamāne kā kyā koī e.atibār kare

maiñ miT chukā huuñ magar Dar mujhe ye hai 'mehdī'

sitam na.e na kahīñ aur rozgār kare

jo iltifat zara bhi nigah-e-yar kare

meri KHizan ko na sharminda-e-bahaar kare

wo zindagi ki jo tar-e-nafas pe ho mauquf

KHilaf-e-aql hai us ka jo eatibar kare

chhupa raha hun main ai zabt-e-gham mohabbat ko

magar ye Dar hai ki ifsha nigah-e-yar kare

jo ban gaya hai sabab rahaton ka duniya mein

wahi gunah na mahshar mein sharmsar kare

usi ko hasil-e-sad-zindagi samajhta hun

wo naqd-e-umr jise sarf-e-rah-e-yar kare

sipas-sanj-e-KHizan hi tamam umr rahun

wo dil na de ki jo girwida-e-bahaar kare

wo jaan de na sukun ki talash ho jis ko

wo dil hamein de jo har lahza be-qarar kare

zahe-nasib mere wah re karam us ka

jo apne bandon mein mujh ko bhi wo shumar kare

banaun rashk-e-bahaaran na kis liye us ko

wo zaKHm jo mere sine ko gul-ezar kare

tariq-e-kar hamein ho ata wahi ya-rab

bina-e-rasm-e-mohabbat jo ustuwar kare

payam-e-wasl na kyon le ke maut aa jae

tamam umr agar sarf-e-rah-e-yar kare

dayar-e-sarwar-e-KHuban se wo nasim aae

meri KHizan ko jo sarmaya-e-bahaar kare

na sargiran ho wahi baada chahta hun main

wo baada kya ho jo sarf-e-rah-e-KHumar kare

jo inqalab pasand kaenat KHud hi ho

to phir zamane ka kya koi eatibar kare

main miT chuka hun magar Dar mujhe ye hai 'mehdi'

sitam nae na kahin aur rozgar kare