jo is tarah se main KHud ko pachhaD leta hun

jo is tarah se maiñ ḳhud ko pachhāḌ letā huuñ

banā banāyā ta.alluq bigāḌ letā huuñ

maiñ nā-samajh to nahīñ ranjishoñ se laḌtā phirūñ

maiñ ruḳh badal ke mohabbat kī aaḌ letā huuñ

jo gard zehn pe girtī hai bad-gumānī kī

maiñ gaahe gaahe use ḳhud hī jhaaḌ letā huuñ

maiñ rāhatoñ se kabhī mutma.in nahīñ hotā

maiñ soch soch ke ḳhushiyāñ ujaaḌ letā huuñ

ye dard bhī yūñhī aTkheliyāñ nahīñ karte

kabhī kabhī maiñ inheñ chheḌ-chhāḌ letā huuñ

tumhāre dukh meñ koī aur dukh milātā nahīñ

maiñ shab guzār ke ḳhema ukhāḌ letā huuñ

kitāb-e-zīst tujhe ġham nahīñ thamātā koī

maiñ din guzār ke safhe ko phaaḌ letā huuñ

jo is tarah se main KHud ko pachhaD leta hun

bana banaya talluq bigaD leta hun

main na-samajh to nahin ranjishon se laDta phirun

main ruKH badal ke mohabbat ki aaD leta hun

jo gard zehn pe girti hai bad-gumani ki

main gahe gahe use KHud hi jhaD leta hun

main rahaton se kabhi mutmain nahin hota

main soch soch ke KHushiyan ujaD leta hun

ye dard bhi yunhi aTkheliyan nahin karte

kabhi kabhi main inhen chheD-chhaD leta hun

tumhaare dukh mein koi aur dukh milata nahin

main shab guzar ke KHema ukhaD leta hun

kitab-e-zist tujhe gham nahin thamata koi

main din guzar ke safhe ko phaD leta hun