jo kah diya wo kar ke dikhana paDa mujhe

jo kah diyā vo kar ke dikhānā paḌā mujhe

is dil-lagī meñ jaan se jaanā paḌā mujhe

jis ke baġhair saañs bhī lenā muhāl thā

haa.e vo ek shaḳhs bhulānā paḌā mujhe

jīvan meñ koī aur thā dil meñ thā koī aur

donoñ se haal dil kā chhupānā paḌā mujhe

phir jis ke baa'd milne kā imkān hī na thā

āḳhir vo faisla bhī sunānā paḌā mujhe

is baar hausle se jo ġham us ke sah ga.ī

ehsān zindagī kā uThānā paḌā mujhe

chāhat meñ ek moḌ judā.ī kā thā magar

dil ne kahā to lauT ke aanā paḌā mujhe

nārāz thī maiñ us se magar is ke bāvajūd

collar meñ us ke phuul sajānā paḌā mujhe

vo chāhtā nahīñ thā mirī zaat kī numū

hastī ko is liye bhī miTānā paḌā mujhe

maiñ jis ko dekhne kī ravā-dār tak na thī

sar us ke sāmne bhī jhukānā paḌā mujhe

apne lahū se diip jalā kar tamām raat

ai ishq terā jashn manānā paḌā mujhe

vo rāsta na bhaTke 'sadaf' is ke vāste

dariyā meñ ik charāġh bahānā paḌā mujhe

jo kah diya wo kar ke dikhana paDa mujhe

is dil-lagi mein jaan se jaana paDa mujhe

jis ke baghair sans bhi lena muhaal tha

hae wo ek shaKHs bhulana paDa mujhe

jiwan mein koi aur tha dil mein tha koi aur

donon se haal dil ka chhupana paDa mujhe

phir jis ke ba'd milne ka imkan hi na tha

aaKHir wo faisla bhi sunana paDa mujhe

is bar hausle se jo gham us ke sah gai

ehsan zindagi ka uThana paDa mujhe

chahat mein ek moD judai ka tha magar

dil ne kaha to lauT ke aana paDa mujhe

naraaz thi main us se magar is ke bawajud

collar mein us ke phul sajaana paDa mujhe

wo chahta nahin tha meri zat ki numu

hasti ko is liye bhi miTana paDa mujhe

main jis ko dekhne ki rawa-dar tak na thi

sar us ke samne bhi jhukana paDa mujhe

apne lahu se dip jala kar tamam raat

ai ishq tera jashn manana paDa mujhe

wo rasta na bhaTke 'sadaf' is ke waste

dariya mein ek charagh bahana paDa mujhe