jo kaha jis ne ba-zid hai use manwane mein

jo kahā jis ne ba-zid hai use manvāne meñ

baat kuchh aur ulajhtī ga.ī suljhāne meñ

kaun samjhegā adā kī hai jo qīmat ham ne

muft hī ḳhud ko gañvā baiThe use paane meñ

kyā kahā aap ne nuqsān huā kuchh bhī nahīñ

aa.ina TuuT gayā aap ke sharmāne meñ

dāstāñ itnī hai āġhāz se anjām talak

husn thā parda-nashīñ ishq thā vīrāne meñ

kaam ab ahl-e-siyāsat kā yahāñ koī nahīñ

aag nafrat kī lage rahte haiñ bhaḌkāne meñ

DhūñDte kyā ho mile jis se kisī ko saaya

aisā kirdār nahīñ dhuup ke afsāne meñ

kyā huā kis liye ġham koī bhī mātam karne

aaj aayā hī nahīñ dil ke azā-ḳhāne meñ

kho diyā hosh hī jis jis ne lagāyā muñh se

kyā balā kā hai nasha ishq ke paimāne meñ

yaad 'ash.har' na dilā mujh ko vo guzrī bāteñ

der lagtī hai kahāñ choT ubhar aane meñ

jo kaha jis ne ba-zid hai use manwane mein

baat kuchh aur ulajhti gai suljhane mein

kaun samjhega ada ki hai jo qimat hum ne

muft hi KHud ko ganwa baiThe use pane mein

kya kaha aap ne nuqsan hua kuchh bhi nahin

aaina TuT gaya aap ke sharmane mein

dastan itni hai aaghaz se anjam talak

husn tha parda-nashin ishq tha virane mein

kaam ab ahl-e-siyasat ka yahan koi nahin

aag nafrat ki lage rahte hain bhaDkane mein

DhunDte kya ho mile jis se kisi ko saya

aisa kirdar nahin dhup ke afsane mein

kya hua kis liye gham koi bhi matam karne

aaj aaya hi nahin dil ke aza-KHane mein

kho diya hosh hi jis jis ne lagaya munh se

kya bala ka hai nasha ishq ke paimane mein

yaad 'ashhar' na dila mujh ko wo guzri baaten

der lagti hai kahan choT ubhar aane mein