جو کہتا ہوں سچ کہتا ہوں برسوں سے

جو کہتا ہوں سچ کہتا ہوں برسوں سے

جھوٹوں میں رہ کر سچا ہوں برسوں سے

وار کرے ہے مجھ پر ہر قاتل لمحہ

حیرت ہے پھر بھی زندہ ہوں برسوں سے

مجھ کو کیا آئینہ دکھائے گا کوئی

آپ میں اپنا آئینہ ہوں برسوں سے

چلتے پھرتے سایوں کی یہ بستی ہے

بھیڑ میں رہ کر بھی تنہا ہوں برسوں سے

بے حرکت ہوں پتھر کے بت کی صورت

اور سر بازار کھڑا ہوں برسوں سے

لمحہ لمحہ جلتا بجھتا رہتا ہوں

میں بھی جیسے ایک دیا ہوں برسوں سے