jo kal talak thi mohabbaton mein hamari shiddat nahin dikhegi

jo kal talak thī mohabbatoñ meñ hamārī shiddat nahīñ dikhegī

tumheñ dobāra qarīb laane kī dil meñ hasrat nahīñ dikhegī

hameñ ye lagtā hai baad marne ke saath vahshat bhī dafn hogī

hamārā da.avā hai aisī nādir kahīñ bhī turbat nahīñ dikhegī

bhale hī āñkhoñ kī saarī nīñdeñ chaḌhā deñ vahshat kī bheñT lekin

hamāre ḳhvāboñ kī kirchiyoñ meñ tumhārī sūrat nahīñ dikhegī

tumhāre gaañv se vaqt-e-hijrat hameñ to bas ek hī qalaq thā

hamārī āñkhoñ kā rizq jo thī hasīn sūrat nahīñ dikhegī

vo laakh chāheñ ki zikr-e-'sundus' pe baat yaksar badal dī jaa.e

to kyā kisī ko bhī un ke chehre kī uḌtī rañgat nahīñ dikhegī

jo kal talak thi mohabbaton mein hamari shiddat nahin dikhegi

tumhein dobara qarib lane ki dil mein hasrat nahin dikhegi

hamein ye lagta hai baad marne ke sath wahshat bhi dafn hogi

hamara dawa hai aisi nadir kahin bhi turbat nahin dikhegi

bhale hi aankhon ki sari ninden chaDha den wahshat ki bhenT lekin

hamare KHwabon ki kirchiyon mein tumhaari surat nahin dikhegi

tumhaare ganw se waqt-e-hijrat hamein to bas ek hi qalaq tha

hamari aankhon ka rizq jo thi hasin surat nahin dikhegi

wo lakh chahen ki zikr-e-'sundus' pe baat yaksar badal di jae

to kya kisi ko bhi un ke chehre ki uDti rangat nahin dikhegi