جو خود بیمار ہیں وہ لوگ بھی نسخے بتاتے ہیں

جو خود بیمار ہیں وہ لوگ بھی نسخے بتاتے ہیں

ہمیں کیسے سفر کرنا ہے یہ اندھے بتاتے ہیں

ٹھکانے پر پہنچنے کی خوشی چہرہ بتاتا ہے

حقیقت راستوں کی پاؤں کے چھالے بتاتے ہے

گھلی ہے شاعری کی اس قدر خوشبو فضاؤں میں

ہمیں باریکیاں غزلوں کی اب بچے بتاتے ہیں

تمہاری بے یقینی پر فقط افسوس اتنا ہے

میں جھوٹا ہوں تمہیں یہ بات بھی جھوٹے بتاتے ہیں

سنا ہے قول پر قربان ہو جاتے تھے پہلے لوگ

ہمارے گاؤں کے ہم کو بڑے بوڑھے بتاتے ہیں

ترقی اور اب اس سے زیادہ کیا رتنؔ ہوگی

مقدر آدمی کا آج کل طوطے بتاتے ہیں