jo KHud bimar hain wo log bhi nusKHe batate hain

jo ḳhud bīmār haiñ vo log bhī nusḳhe batāte haiñ

hameñ kaise safar karnā hai ye andhe batāte haiñ

Thikāne par pahuñchne kī ḳhushī chehra batātā hai

haqīqat rāstoñ kī paañv ke chhāle batāte hai

ghulī hai shā'irī kī is qadar ḳhushbū fazāoñ meñ

hameñ bārīkiyāñ ġhazloñ kī ab bachche batāte haiñ

tumhārī be-yaqīnī par faqat afsos itnā hai

maiñ jhūTā huuñ tumheñ ye baat bhī jhūTe batāte haiñ

sunā hai qaul par qurbān ho jaate the pahle log

hamāre gaañv ke ham ko baḌe būḌhe batāte haiñ

taraqqī aur ab is se ziyāda kyā 'ratan' hogī

muqaddar aadmī kā āj-kal tote batāte haiñ

jo KHud bimar hain wo log bhi nusKHe batate hain

hamein kaise safar karna hai ye andhe batate hain

Thikane par pahunchne ki KHushi chehra batata hai

haqiqat raston ki panw ke chhaale batate hai

ghuli hai sha'iri ki is qadar KHushbu fazaon mein

hamein barikiyan ghazlon ki ab bachche batate hain

tumhaari be-yaqini par faqat afsos itna hai

main jhuTa hun tumhein ye baat bhi jhuTe batate hain

suna hai qaul par qurban ho jate the pahle log

hamare ganw ke hum ko baDe buDhe batate hain

taraqqi aur ab is se ziyaada kya 'ratan' hogi

muqaddar aadmi ka aaj-kal tote batate hain