jo KHwab mere nahin the main un ko dekhta tha

jo ḳhvāb mere nahīñ the maiñ un ko dekhtā thā

isī liye aañkh khul ga.ī thī isī liye dil dukhā huā thā

udāsiyoñ se bharī huī iltijā sunī thī

kisī nagar meñ koī kisī ko pukārtā thā

vo ik sadā thī ki haft-ālam meñ gūñjtī thī

na-jāne kaise koī kisī se bichhaḌ gayā thā

ajiib hairat bikherte the vo dāstāñ-go

ki shab ne jaane se saaf inkār kar diyā thā

guzishtagāñ ko bhī ye gila thā sunā hai maiñ ne

sunā hai un ko bhī ism-e-āzam nahīñ milā thā

fazā sunahrī thī rañg phailā thā chaar jānib

ki chāñd se vo zamīñ pe jaise utar rahā thā

safar ke āḳhir pe sham.eñ raushan sī ho ga.ī thiiñ

koī masarrat kī sab hadoñ se guzar gayā thā

jo KHwab mere nahin the main un ko dekhta tha

isi liye aankh khul gai thi isi liye dil dukha hua tha

udasiyon se bhari hui iltija suni thi

kisi nagar mein koi kisi ko pukarta tha

wo ek sada thi ki haft-alam mein gunjti thi

na-jaane kaise koi kisi se bichhaD gaya tha

ajib hairat bikherte the wo dastan-go

ki shab ne jaane se saf inkar kar diya tha

guzishtagan ko bhi ye gila tha suna hai main ne

suna hai un ko bhi ism-e-azam nahin mila tha

faza sunahri thi rang phaila tha chaar jaanib

ki chand se wo zamin pe jaise utar raha tha

safar ke aaKHir pe shamen raushan si ho gai thin

koi masarrat ki sab hadon se guzar gaya tha