jo koi dar pe tere baiThe hain

jo koī dar pe tire baiThe haiñ

donoñ aalam se phire baiThe haiñ

juuñ nam-e-ashk tū kis se hai ḳhafā

yaañ koī pal meñ gire baiThe haiñ

dard-e-dil kyūñ-ki kahūñ maiñ us se

har taraf log ghire baiThe haiñ

koī aayā hī na bhūlā ham to

kab se raste ke sire baiThe haiñ

garm kar de tū Tuk āġhosh meñ aa

maare jaaḌe ke Thire baiThe haiñ

qulzum-e-ishq kā ulTā hai tarīq

yaañ jo Duube so tire baiThe haiñ

kis ko duuñ dosh tirī majlis meñ

apne mushfiq hī nire baiThe haiñ

ham to 'qā.em' na Thaharte yak-dam

lek yaañ dil ke ghire baiThe haiñ

jo koi dar pe tere baiThe hain

donon aalam se phire baiThe hain

jun nam-e-ashk tu kis se hai KHafa

yan koi pal mein gire baiThe hain

dard-e-dil kyun-ki kahun main us se

har taraf log ghire baiThe hain

koi aaya hi na bhula hum to

kab se raste ke sire baiThe hain

garm kar de tu Tuk aaghosh mein aa

mare jaDe ke Thire baiThe hain

qulzum-e-ishq ka ulTa hai tariq

yan jo Dube so tere baiThe hain

kis ko dun dosh teri majlis mein

apne mushfiq hi nire baiThe hain

hum to 'qaem' na Thaharte yak-dam

lek yan dil ke ghire baiThe hain