jo kuchh bhi mere pas thi daulat nigal gai

jo kuchh bhī mere paas thī daulat nigal ga.ī

merī anā ko terī mohabbat nigal ga.ī

tasvīr kah rahī thī musavvir kī dāstāñ

manzar-kashī ko aañkh kī hairat nigal ga.ī

hisse meñ mere aa.ī hamesha shab-e-firāq

har lamha-e-nashāt ko zulmat nigal ga.ī

maiñ ne jalā.ī aag adū ke liye magar

merā vajūd aag kī hiddat nigal ga.ī

maiñ bad nahīñ huuñ bas yūñhī badnām ho gayā

kirdār merā jehl kī tohmat nigal ga.ī

kal aa.ine meñ ḳhud ko maiñ be-shakl kyuuñ lagā

kyā gardish-e-jahāñ mirī sūrat nigal ga.ī

īmān apne hāthoñ meñ mahfūz thā kahāñ

jo bach gayā thā us ko bhī bid.at nigal ga.ī

ġhurbat ne mere shahr kā naqsha badal diyā

ġhairat ko zinda rahne kī chāhat nigal ga.ī

ab fann-e-shā.irī meñ taġhazzul kahāñ bachā

ya.anī ġhazal ke husn ko jiddat nigal ga.ī

jo kuchh bhi mere pas thi daulat nigal gai

meri ana ko teri mohabbat nigal gai

taswir kah rahi thi musawwir ki dastan

manzar-kashi ko aankh ki hairat nigal gai

hisse mein mere aai hamesha shab-e-firaq

har lamha-e-nashat ko zulmat nigal gai

main ne jalai aag adu ke liye magar

mera wajud aag ki hiddat nigal gai

main bad nahin hun bas yunhi badnam ho gaya

kirdar mera jehl ki tohmat nigal gai

kal aaine mein KHud ko main be-shakl kyun laga

kya gardish-e-jahan meri surat nigal gai

iman apne hathon mein mahfuz tha kahan

jo bach gaya tha us ko bhi bidat nigal gai

ghurbat ne mere shahr ka naqsha badal diya

ghairat ko zinda rahne ki chahat nigal gai

ab fann-e-shairi mein taghazzul kahan bacha

yani ghazal ke husn ko jiddat nigal gai