jo kuchh hua KHabar hai usi ki raza se hai

jo kuchh huā ḳhabar hai usī kī razā se hai

ham ko gila kisī se nahīñ hai ḳhudā se hai

jannat meñ mutma.in na jahannum meñ muztarib

parvarda dil zamīn kī āb-o-havā se hai

dushman hai aadmī kā azal se ḳhud aadmī

ya.anī muqābla ye balā kā balā se hai

har ġhair se to ḳhuub guzāra kiyā magar

ai dil mo.āmla tirā ab āshnā se hai

hai zauq kā jamāl se aage mo.āmla

rabt-e-nigāh-e-shauq tumhārī adā se hai

phailā.iye sulūk kā ham tak bhī dā.era

matlab ravā se hai na ġharaz nāravā se hai

ho munfa.il ki bār-e-digar haath uTh ga.e

dil munharif duā se nahīñ mudda.ā se hai

qudsī kare qabā bashariyyat kī zeb-tan

gar vāqa.ī murād koī irtiqā se hai

'shaukat' qalam adū ke tasarruf meñ aa gayā

fan meñ bapā ye ma.arka to ibtidā se hai

jo kuchh hua KHabar hai usi ki raza se hai

hum ko gila kisi se nahin hai KHuda se hai

jannat mein mutmain na jahannum mein muztarib

parwarda dil zamin ki aab-o-hawa se hai

dushman hai aadmi ka azal se KHud aadmi

yani muqabla ye bala ka bala se hai

har ghair se to KHub guzara kiya magar

ai dil moamla tera ab aashna se hai

hai zauq ka jamal se aage moamla

rabt-e-nigah-e-shauq tumhaari ada se hai

phailaiye suluk ka hum tak bhi daera

matlab rawa se hai na gharaz narawa se hai

ho munfail ki bar-e-digar hath uTh gae

dil munharif dua se nahin muddaa se hai

qudsi kare qaba bashariyyat ki zeb-tan

gar waqai murad koi irtiqa se hai

'shaukat' qalam adu ke tasarruf mein aa gaya

fan mein bapa ye marka to ibtida se hai