jo kuchh kiya so humne kiya apni chah se

jo kuchh kiyā so ham ne kiyā apnī chaah se

ab shikva kījiye na kuchh us rashk-e-māh se

āshiq ke rozgār ko us ne siyah kiyā

kākul se ḳhat se zulf se ḳhālī siyāh se

tāb-o-tavān-o-dīn-o-dil-o-aql-o-sabr-o-hosh

vo shoḳh mujh se le gayā sab ik nigāh se

kī charḳh kaj-ravish ne ye kyā kaj-adā.ī ḳharch

jo ham ko āshnā kiyā us kaj-kulāh se

kasrat nujūm kī na falak par ye samjhiyo

ġhirbāl ho gayā hai mire tīr-e-āh se

us shoḳh ḳhud-pasand se pūchhe koī sahī

sābit huā hai qatl mirā kis gunāh se

pyāre abas hue ho 'jahāñdār' se ḳhafā

be-dil na ho tum aise dilī-ḳhair-ḳhvāh se

jo kuchh kiya so hum ne kiya apni chah se

ab shikwa kijiye na kuchh us rashk-e-mah se

aashiq ke rozgar ko us ne siyah kiya

kakul se KHat se zulf se KHali siyah se

tab-o-tawan-o-din-o-dil-o-aql-o-sabr-o-hosh

wo shoKH mujh se le gaya sab ek nigah se

ki charKH kaj-rawish ne ye kya kaj-adai KHarch

jo hum ko aashna kiya us kaj-kulah se

kasrat nujum ki na falak par ye samjhiyo

ghirbaal ho gaya hai mere tir-e-ah se

us shoKH KHud-pasand se puchhe koi sahi

sabit hua hai qatl mera kis gunah se

pyare abas hue ho 'jahandar' se KHafa

be-dil na ho tum aise dili-KHair-KHwah se