jo kuchh tha muqaddar mein gawara to nahin tha

jo kuchh thā muqaddar meñ gavārā to nahīñ thā

dar-parda kahīñ un kā ishārā to nahīñ thā

jitnī thī khaTak saañs kī kul naġhma-e-jāñ thī

kyā tum ne mujhe hañs ke pukārā to nahīñ thā

tā-zīst mujhe jān-e-hazīñ baḳhshne vaale

is meñ koī andāz tumhārā to nahīñ thā

ro ro ke qayāmat kā liyā naam kisī ne

koī tirī ummīd kā maarā to nahīñ thā

TuuTe hue kyoñ dil ko mire dekh rahe ho

aañsū thā mirī sub.h kā taarā to nahīñ thā

muddat se baḌā naam hai firdaus kā 'kaifī'

gesū ko kahīñ us ne sañvārā to nahīñ thā

jo kuchh tha muqaddar mein gawara to nahin tha

dar-parda kahin un ka ishaara to nahin tha

jitni thi khaTak sans ki kul naghma-e-jaan thi

kya tum ne mujhe hans ke pukara to nahin tha

ta-zist mujhe jaan-e-hazin baKHshne wale

is mein koi andaz tumhaara to nahin tha

ro ro ke qayamat ka liya nam kisi ne

koi teri ummid ka mara to nahin tha

TuTe hue kyon dil ko mere dekh rahe ho

aansu tha meri subh ka tara to nahin tha

muddat se baDa nam hai firdaus ka 'kaifi'

gesu ko kahin us ne sanwara to nahin tha