jo log bhi haalat se ghabrae hue hain

jo log bhī hālāt se ghabrā.e hue haiñ

chaukhaT pe tumhārī vo sabhī aa.e hue haiñ

jin ko bhī milī ḳhāk-e-dar-e-yār zarā sī

be-nūr jabīnoñ ko vo chamkā.e hue haiñ

dāman ko jhulasne se bachāne kī ġharaz kyā

sho.ale ye tumhāre hī to bhaḌkā.e hue haiñ

chāho to agar baañT lo ham se ġham-e-hijrāñ

ham bhī to kisī shaḳhs ke Thukrā.e hue haiñ

rakkhe haiñ vo zindān ko ābād ḳhushī se

zanjīr ġhulāmī kī jo khankā.e hue haiñ

chāTe haiñ tire hijr ke lamhāt badan ko

ye vasl ke imkān mujhe khaa.e hue haiñ

mahfil meñ ghumāte hue uñglī se vo kākul

kyā jāniye kis kis pe sitam Dhaa.e hue haiñ

ab kaise batā.ūñ tirī zulfoñ se ziyāda

duniyā ke masā.il mujhe uljhā.e hue haiñ

apnoñ se hī karnī hai hameñ apnī hifāzat

allāh ye kis daur meñ ham aa.e hue haiñ

paḌtī hī nahīñ haiñ kabhī ḳhushiyoñ kī shuā.eñ

har samt mire abr-e-sitam chhā.e hue haiñ

'afzal' nahīñ rahtā koī duniyā meñ hamesha

phir aap ye kis baat pe itrā.e hue haiñ

jo log bhi haalat se ghabrae hue hain

chaukhaT pe tumhaari wo sabhi aae hue hain

jin ko bhi mili KHak-e-dar-e-yar zara si

be-nur jabinon ko wo chamkae hue hain

daman ko jhulasne se bachane ki gharaz kya

shoale ye tumhaare hi to bhaDkae hue hain

chaho to agar banT lo hum se gham-e-hijran

hum bhi to kisi shaKHs ke Thukrae hue hain

rakkhe hain wo zindan ko aabaad KHushi se

zanjir ghulami ki jo khankae hue hain

chaTe hain tere hijr ke lamhat badan ko

ye wasl ke imkan mujhe khae hue hain

mahfil mein ghumate hue ungli se wo kakul

kya jaaniye kis kis pe sitam Dhae hue hain

ab kaise bataun teri zulfon se ziyaada

duniya ke masail mujhe uljhae hue hain

apnon se hi karni hai hamein apni hifazat

allah ye kis daur mein hum aae hue hain

paDti hi nahin hain kabhi KHushiyon ki shuaen

har samt mere abr-e-sitam chhae hue hain

'afzal' nahin rahta koi duniya mein hamesha

phir aap ye kis baat pe itrae hue hain