جو مکاں تھا لا مکاں ہونے لگا ہے

جو مکاں تھا لا مکاں ہونے لگا ہے

اب زمیں پر آسماں ہونے لگا ہے

داستاں دیوار و در کہنے لگے ہیں

آدمی تو بے زباں ہونے لگا ہے

زندگی کے ساتھ چل کر دیکھیے تو

حادثہ کیا کیا یہاں ہونے لگا ہے

بے سبب کچھ لوگ مجھ سے مل رہے ہیں

وقت شاید مہرباں ہونے لگا ہے

میں نکل آیا ہوں جس کی رہ گزر سے

میرے اندر وہ نہاں ہونے لگا ہے

دھند کی دیوار ہے منظر بہ منظر

راستہ پھر بے نشاں ہونے لگا ہے

آندھیوں کی زد میں آ پہنچا ہے انساں

گرد میں گم کارواں ہونے لگا ہے

پڑھ رہے ہیں لوگ چہرے کی تمازت

حال چہرے سے بیاں ہونے لگا ہے

یاد اس کی چل رہی ہے ساتھ خالدؔ

وہ متاع جسم و جاں ہونے لگا ہے