jo makan tha la-makan hone laga hai

jo makāñ thā lā-makāñ hone lagā hai

ab zamīñ par āsmāñ hone lagā hai

dāstāñ dīvār-o-dar kahne lage haiñ

aadmī to be-zabāñ hone lagā hai

zindagī ke saath chal kar dekhiye to

hādisa kyā kyā yahāñ hone lagā hai

be-sabab kuchh log mujh se mil rahe haiñ

vaqt shāyad mehrbāñ hone lagā hai

maiñ nikal aaya huuñ jis kī rahguzar se

mere andar vo nihāñ hone lagā hai

dhund kī dīvār hai manzar-ba-manzar

rāsta phir be-nishāñ hone lagā hai

āñdhiyoñ kī zad meñ aa pahuñchā hai insāñ

gard meñ gum kārvāñ hone lagā hai

paḌh rahe haiñ log chehre kī tamāzat

haal chehre se bayāñ hone lagā hai

yaad us kī chal rahī hai saath 'ḳhālid'

vo matā.a-e-jism-o-jāñ hone lagā hai

jo makan tha la-makan hone laga hai

ab zamin par aasman hone laga hai

dastan diwar-o-dar kahne lage hain

aadmi to be-zaban hone laga hai

zindagi ke sath chal kar dekhiye to

hadisa kya kya yahan hone laga hai

be-sabab kuchh log mujh se mil rahe hain

waqt shayad mehrban hone laga hai

main nikal aaya hun jis ki rahguzar se

mere andar wo nihan hone laga hai

dhund ki diwar hai manzar-ba-manzar

rasta phir be-nishan hone laga hai

aandhiyon ki zad mein aa pahuncha hai insan

gard mein gum karwan hone laga hai

paDh rahe hain log chehre ki tamazat

haal chehre se bayan hone laga hai

yaad us ki chal rahi hai sath 'KHalid'

wo mataa-e-jism-o-jaan hone laga hai