jo mar gae teri chashm-e-siyah ke mare

jo mar ga.e tirī chashm-e-siyāh ke maare

na hashr ko bhī uTheñge nigāh ke maare

misāl-e-barg-e-ḳhizāñ sarsar-e-firāq se aah

paTakte phirte haiñ sar ham tabāh ke maare

azīzo dil na do yūsuf kī kar ke chaah kabhī

ki jā ke chaah meñ girte haiñ chaah ke maare

ilāhī hashr meñ āvāz-e-sūr sun kyūñkar

uThūñgā aah maiñ bār-e-gunāh ke maare

hazar kar āh-e-dil-e-nātavāñ se ai zālim

ki koh Tal ga.e haiñ barg-e-kāh ke maare

na samjhiyo ki falak par sitāre haiñ raushan

haiñ raḳhna-dār mire tīr-e-āh ke maare

bisān-e-naqsh-e-qadam tere dar se ahl-e-vafā

uThāte sar nahīñ hargiz tabāh ke maare

ujaḌ ga.e ḳhirad-o-sabr-o-hosh-o-tāb-o-tavāñ

usī ke nāz-o-adā kī sipāh ke maare

jahān-e-dil ai 'jahāñdār' ek din na basā

jafā-e-shāh-e-taġhāful-shi.ār ke maare

jo mar gae teri chashm-e-siyah ke mare

na hashr ko bhi uThenge nigah ke mare

misal-e-barg-e-KHizan sarsar-e-firaq se aah

paTakte phirte hain sar hum tabah ke mare

azizo dil na do yusuf ki kar ke chah kabhi

ki ja ke chah mein girte hain chah ke mare

ilahi hashr mein aawaz-e-sur sun kyunkar

uThunga aah main bar-e-gunah ke mare

hazar kar aah-e-dil-e-natawan se ai zalim

ki koh Tal gae hain barg-e-kah ke mare

na samjhiyo ki falak par sitare hain raushan

hain raKHna-dar mere tir-e-ah ke mare

bisan-e-naqsh-e-qadam tere dar se ahl-e-wafa

uThate sar nahin hargiz tabah ke mare

ujaD gae KHirad-o-sabr-o-hosh-o-tab-o-tawan

usi ke naz-o-ada ki sipah ke mare

jahan-e-dil ai 'jahandar' ek din na basa

jafa-e-shah-e-taghaful-shiar ke mare