جو مرحلۂ سخت کا حامل نہیں ہوتا

جو مرحلۂ سخت کا حامل نہیں ہوتا

وہ زندگی بھر فائز منزل نہیں ہوتا

مجبور پہ مایوس پہ یہ جور مسلسل

مجبور کے مایوس کے کیا دل نہیں ہوتا

اشکوں پہ ہے بے جوڑ سا یہ عکس تبسم

آئینے کے آئینہ مقابل نہیں ہوتا

کیوں زندگی بیگانہ ہوئی جاتی ہے مجھ سے

اب درد سے شاید ادب دل نہیں ہوتا

نادان تو خود اپنی جگہ آپ ہی منزل

کیوں کہتا ہے میں واصل منزل نہیں ہوتا

ترتیب دیا جاتا ہے یہ عزم رواں سے

طوفان میں پنہاں کبھی ساحل نہیں ہوتا

پروانے شفاؔ اس لئے کھا جاتے ہیں دھوکا

نظروں میں مآل شب محفل نہیں ہوتا