جو مزہ زخم جگر درد نہاں میں آئے

جو مزہ زخم جگر درد نہاں میں آئے

آہ میں کیف نہ وہ لطف فغاں میں آئے

آج سچ بولنے کی میں نے جسارت کی تھی

کیوں نہ پھر زخم بھلا میری زباں میں آئے

شہر جاں میں نہ ہوا جب کوئی پرساں ان کا

میرے آنسو مرے دامن کی اماں میں آئے

زندگی نقطۂ آغاز ہے اور کچھ بھی نہیں

کاش انجام بھی کچھ اس کا گماں میں آئے

مل گئی کشمکش وہم و یقیں سے منزل

جب بھی ہم کار گہ شیشہ گراں میں آئے

خون گل جب رگ ہر خار سے جاری ہو جائے

کیوں نہ پھر لطف بہاروں کا خزاں میں آئے

گفتگو پیار کی ہم اس سے کریں کیسے ظہورؔ

بات کرنا جسے نفرت کی زباں میں آئے